Concello de Ames

Somos ames

Momento no que os Reis Magos pasaron polo Milladoiro

Os Reis Magos visitaron Ames e fixeron as ledicias dos máis cativos

[05/01/2008] Os Reis Magos pasaron polas rúas de Ames facendo as ledicias de todos os nenos e nenas. A pesar de que o ceo estivo anubrado non choveu e isto permitiu que a comitiva real puidese desprazarse con absoluta normalidade polas rúas do Milladoiro e Bertamiráns. Isto tamén permitiu que todos os rapaces puidesen saír a rúa para ver as súas maxestades. Houbo unha gran afluencia de público tanto no Milladoiro como en Bertamiráns. Os Magos de Oriente coñeceron de primeira man cales eran os agasallos que os nenos e nenas querían para esta noite.

O Concurso de Cartas aos Reis Magos foi un éxito

Xa se coñecen os gañadores do Concurso de Cartas aos Reis Magos

[05/01/2008] A segunda edición do concurso de Cartas aos Reis Magos foi todo un éxito, xa que participaron arredor de 900 rapaces. A Casa Real de Oriente, xa elixiu os gañadores e os premios entregaranse esta tarde na cabalgata de Reis, que se celebrará no Milladoiro e en Bertamiráns. Os gañadores foron na categoría de educación infantil, Mario Vilar Veiga e Argile Penela Rei, no primeiro ciclo de primaria, Martín Parga Calvo e Fernando Vilariño Bercero, e no segundo ciclo de primaria Afife Sofía Guzmán Cornejo e Uxía Mariño Mateo. As súas maxestades quérenlles dar as grazas a todos os nenos e nenas que participaron polas fermosas cartas que enviaron.

Momento da entrega do trofeo de campión ao capitán do Xuventude Dubresa

O Xuventude Dubresa adxudicouse o VI torneo de Nadal de Baloncesto

[05/01/2008] O Pavillón polideportivo do Milladoiro foi onte o escenario do VI torneo de Nadal de Baloncesto. O Xuventude Dubresa proclamouse campión do torneo ao ter mellor basket average que os seus rivais. O Xuventude perdeu o primeiro encontro ante o Milladoiro XL, pero repúxose desa derrota e venceu por 19 puntos de diferenza ao Club Baloncesto Ames. Esta vitoria serviulle para proclamarse campión do torneo. O CB Ames tivo que conformarse coa segunda posición e o Milladoiro XL foi terceiro. O VI torneo de Nadal de Baloncesto estivo presidido polo concelleiro de Deportes, Francisco Villaverde, e polo concelleiro de Infraestruturas e Obras, Gustavo Nieto.

As obras faranse en tres tramos da estrada

Vaise dotar de andeis peatonais a tres tramos da estrada que une Roxos con Portomouro

[02/01/2009] A concellaría de Política Territorial, Obras Públicas e Transportes da Xunta de Galicia vai realizar unha serie de reformas na estrada AC 453, que une as localidades de Roxos e Portomouro. Estas obras teñen o obxectivo de instalar unha senda peatonal para que os viandantes poidan circular pola estrada sen perigo e sen preocuparse dos vehículos. As obras levaranse a cabo en tres tramos distintos completando unha senda peatonal cun total de pouco máis de dous quilómetros de distancia. O prazo de execución das obras é de dous meses e medio. O custe destas reformas ascenderá a un total de 230.051´36 euros.

Outras noticias